Гонар Сялецкай сельскай бібліятэкі – літаратурна-краязнаўчая гасцёўня “Вытокі Башты”, якая знаёміць з гісторыка-культурнай спадчынай рэгіёна і захоўвае шэраг унікальных краязнаўчых матэрыялаў. Вёска Сялец — радзіма вядомых беларускіх літаратараў: паэта Алеся Разанава, празаіка Віктара Супрунчука, драматурга Міколы Арахоўскага, публіцыста Мікалая Пейгана, этнографа Іосіфа Здановіча, мемуарыста Аляксандра Акінчыца, продкаў акцёра і паэта Уладзіміра Высоцкага. Значны ўклад у развіццё Сяльца ўнеслі сусветна вядомыя прадстаўнікі роду Сапегаў і Радзівілаў, князь Вітаўт, каралева Бона Сфорца.

Першае ўпамінанне аб вёсцы Сялец у пісьмовых крыніцах  датуецца 1397 годам. У 1541 годзе дзякуючы каралеве Боне Сфорца Сялец становіцца мястэчкам, ці інакш – горадам.
Існуе паданне, што даўным-даўно была зусім іншая назва сяла. Пасля страшнай хваробы, калі ўсе жыхары памерлі, прыехалі новыя людзі і засялілі мясцовасць. Сяліліся яны на сухіх высокіх берагах ракі Башты (сёння гэта безымянны канал), адваёўваючы зямлю ў леса, хмызнякоў і балот. Так з’явілася новая назва. Магчыма,  спачатку ёю карысталася толькі адна з груп людзей, якія пасяліліся тут, а пазней яна стала агульнай. Тым больш што назва  Сялец азначае “малое сяло”. [2]

[1] Жучкевич, В.А. Краткий топонимический словарь Белоруссии / В.А. Жучкевич. – Минск : Издательство БГУ, 1974. – С. 339.
[2]   Пейган, М. Сяло ля Башты : краязнаўчы нарыс / Мікалай Пейган. – Мінск : Кнігазбор, 2009. – С. 10-11.